uski katthai aankho me he jantar-mantar sab

uski katthai aankho me he jantar-mantar sab
chaaku-waaku,chhuriyan-wuriyan,khanjar-wanjar sab

jis din se tum ruthi,mujhse ruthe hain
chaadar-waadar,takiya-wakiya,bistar-wistar sab

mujhse bichhar ke wo bhi kahaa ab pahle jaisi hai
Pheekey par gaye kapde-wapre,jewar-wewar sab

aakhir main kis din dubunga,fikren karte hain
dariyaa-wariyaa,kashti-washti,langar-wangar sab

Tulsi ne jo likha ab kuch badla badla sa hai
lanka vanka jangal vangal bandar vandar sab

ishq wishq ke sare nushkhe mujhse seekhtey hain
johar-wohar,tahir-wahir,manzar-wanzar sab

Ye hadsa to kisi din guzarne wala tha

Ye hadsa to kisi din guzarne wala tha
Main bach bhi jata to ek roz marne wala tha

Bulandiyon ka nasha tut kar bikharne laga
Mera jahaz zameen par utarne wala tha

Mera naseeb mere haath kat gaye warna
Main teri maang main sindoor bharne wala tha


Zameen se abke bade faasle uge warna
Wo bhai mujhse bada pyaar karne wala tha

Mere charag meri shab meri mundere hain
Main kab sharir hawaon se darne wala tha

Sabab wo puchh rahein hain udaas hone ka

Sabab wo puchh rahein hain udaas hone ka
Mera mizaz nahi belibaas hone ka

Naya bahana hai har pal udaas hone ka
Ye fayda hai tere ghar ke paas hone ka

Mehakti shaam ke lamho nazar rakho mujh par
Bahana dhoond raha hun udaas hone ka

Main tere paas bata kis garaz se aaya hun
Subut de mujhe chehra shanas hone ka

Meri ghazal se bana zehan main koi tasveer
Sabab na puchh mere devdaas hone ka

Kahan ho aao meri bhuli bisri yaadon aao
Khush aamdeed hai mausam udaas hone ka

Kai dino se tabiyat meri udaas na thi
Yahi javaaz bahut hai udaas hone ka

Is duniya ne meri wafa ka kitna uncha mol diya

Is duniya ne meri wafa ka kitna uncha mol diya
Baton ke tezaab main mere mann ka amrut ghol diya

Jab bhi ko inaam mila hai mera naam bhi bhool gaye
Jab bhi koi ilzaam laga hai mujh par laakar dhol diya

Haath ke chhale paaon ke kaante aankh main aansoo dil ka dard
Tune mujhko pyaar main jo bhi tohfa diya anmol diya

Ab gam aayen khushiyaan aayen maut aaye yaa tu aaye
Maine to bas aahat paayi aur darwaza khol diya

Jitna khushi se rishtaa mera utna gam se naata hai
Maine ek mizaan main apna saara dukh sukh tol diya

Masarraton k khazaney to kam nikaltey hain

Masarraton k khazaney to kam nikaltey hain
kisi bhi seeney ko kholo to gham nikaltey hain

ye karbala ki zameen hai isey salam karo
yahan zameen sey patthar bhi nam nikaltey hain

yahi hai zid to hatheli pe apni jaan liye
ameer-e-sheher sey keh do k hum nikaltey hain

kahan har ek ko miltey hain chahney waley
naseeb walon k gesu main kham nikaltey hain

jahan sey hamko guzarrney main sharm ati hai
usi gali sey kayi mohtaram nikaltey hain

mujhey batao k main khilkhila k kaisey hansun
k roz khana-e- dil sey alam nikaltey hain

tumharey ahad-e-huqumat ka saniha ye hai
k ab to log gharon sey bhi kam nikaltey hain

HAMARA TEER KUCH BHI HO NISHAANE TAK PAHUCHTA HAI

HAMARA TEER KUCH BHI HO NISHAANE TAK PAHUCHTA HAI,
PARINDA KOI MAUSAM HO THIKAANE TAK PAHUCHTA HAI

DHUAN BAADAL NAHI HOTA KI BACHPAN DAUD PADTA HAI
KHUSHI SE KAUN BACHCHA KAARKHAANE TAK PAHUCHTA HAI

MAIN CHAHOON TOH MITHAI KI DUKANEIN KHOL SAKTA HUN,
MAGAR BACHPAN HAMESHA RAAMDAANE TAK PAHUCHTA HAI

ABHI AYE ZINDAGI TUMKO HAMARA SAATH DENA HAI
ABHI BETA HAMARA SIRF SHAANE TAK PAHUCHTA HAI....

Suna Hai Log Usey Ankh Bher Key Dekhtey Hain

Suna Hai Log Usey Ankh Bher Key Dekhtey Hain
Soo Us Key Shehr Main Kuch Din Thehr Key Dekhtey Hain

Suna Hai Rabt Hai Us Ko Kharab Halaoon Sey
Soo Apney Aap Ko Barbad Ker Key Dekhtey Hain

Suna Hai Dard Ki Gahak Hai Chashm-E-Naaz Us Ki
Soo Hum Bhi Us Ki Galee Sey Guzar Key Dekhtey Hain

Suna Hai Booley To Batoon Sey Phool Jhartey Hain
Yeh Baat Hai To Chaloo Baat Ker Key Dekhtey Hain

Suna Hai Din Ko Usey Titliyan Satati Hain
Suna Hai Raat Ko Jugno Thehr Key Dekhtey Hain

Suna Hai Hashr Hain Us Ki Ghazzaal See Ankheen
Suna Hai Us Ko Hiran Dasht Bher Key Dekhtey Hain

Suna Hai Us Ki Siyah Chashmagi Qayamt Hai
Soo Us Ko Surma Firoosh Aah Bher Key Dekhtey Hain

Bus Ek Nigah Sey Lut-Ta Hai Qafla Dil Ka
Soo Rahwaan-E-Tammana Bhi Dar Key Dekhtey Hain

Rukey To Gardisheen Us Ka Tawaf Kerti Hain
Chaley To Us Ko Zamaney Thehr Key Dekhtey Hain

Kahanian Hee Sahih Sab Mubalghey Hee Sahih
Ager Woh Khawb Hai Tabeer Ker Key Dekhtey Hain

Sulagte harf ka nashsha utaarne waale

Sulagte harf ka nashsha utaarne waale
Ghazal utaar sahifaa utaarne waale

Ye bhul mat ke abhi sar pe aasman bhi hai
Kisi ke sar ka dupatta utaarne waale

Woh aaj chalne lagey paayenche utthaye huye
Kabhi chadaa hua dariya utaarne waale

Bitthaye phirtey hain duniya ko apni palkon par
Meri nigaah se duniya utaarne waale

Akelepan ke siyaah naag das rahe hain mujhe
Madad parindo ka joda utaarne waale

Mazaak bante hain andekhe haadson ke liye
Zara si baat par chehraa utaarne waale

Hamaari jaan ke dushman bane huye hain aaj
humaari jaan ka sadkaa utaarne waale

Mohabbat karne waalaa zindgi bhar kuchh nahi kahtaa;

Mohabbat karne waalaa zindgi bhar kuchh nahi kahtaa;
ki dariyaa shor kartaa hai samandar kuchh nahin kahtaa.

to kyaa majbooriyaann be-jaan cheezein bhi samajhti hain;
gale se jab utartaa hai to zewar kuchh nahin kahtaa.

badaa gahraa nashaa hotaa hai maidaanon mein marne kaa ;
ki jaan dete huye lashkar kaa lashkar kuchh nahin kahtaa.

hamaari iltijaayen be-zubaan bachchon k jaisi hain;
bazaahir to kisi se ret kaa ghar kuchh nahin kahtaa.

hameshaa sabr ko ruswaa kiyaa hai bheegi aankhon ne;
zaroorat cheekh padti hai gadaagar kuchh nahin kahtaa.

mere dil se mere chehre kaa samjhautaa maze kaa hai;
ye andar kuchh nahin kahtaa wo baahar kuchh nahin kahtaa............

Wo eK gudda banati hai Mai ek guriya banata hun..

Tasawwur Mey Sahi lekin mai Guldasta Banata hoon

Sazaein Dijiye Mai app ka chehra Banata hoon

Dalit Aurat ki surat fhir rahi hai sari duniya mey
Tujhey e Mufhlisi aaj se mai apna banata hoon

Na Jannat maine dekhi hai Na jannat ki tawaqo hai
Magar mai khwab mey is mulq ka Nakshah banata hoon

mujhey Apni wafadari pey Koi shaq nahi hota
Mai khoney dil mila deta hoon Jab jhanda Banata hoon

meri Tameer key kissey kahin Likhey na Jayengey
Mai Jangal se gujarney ke liye Rasta Banata hoon

Bichad kar bhi Judey Raheney ka ye accha tareeka hai
wo ek gudda banati hai mai ek gudiya Banata hoon

Agra koi accha sa naam socho to bata dena
Mai apni khwab ki katran se ek chehra Banata hoon

Massarat ka koi pyaala na meri chaq se utra
Kabhi laxmi Banata hoon kabhi durga Banata hoon

Ghazal pheri lagaakar bechtaa hoon

Ghazal pheri lagaakar bechtaa hoon
Main sarrafe main patthar bechtaa hoon

siyaah mitti ki chidiyon ke badan par
gulaabi par lagaa kar bechtaa hoon

Mujhe parwaah nahi sud o ziyaa ki
main qatron main samandar bechtaa hoon

Jahaan chaaron taraf bechahergi hai
Wahan Aaine laakar bechtaa hoon

Woh kaagaz ki munedere baandhta hai
Main matti ke kabutar bechtaa hoon

Kharidey hain mere bachchon ne faake
Main sadkon par muqaddar bechtaa hoon

Khamoshi hai mere lafzon ki gaahak
Badey naayab gohar bechtaa hoon

Puraani ho chuki hain saari khabrein
Magar unwaan badal kar bechtaa hoon

Kitaabon ki dukaan kholi hai maine
Bahut sastey main zevar bechtaa hoon

There is a candle in your heart,

There is a candle in your heart,

ready to be kindled.
There is a void in your soul,
ready to be filled.
You feel it, don't you?
You feel the separation
from the Beloved.
Invite Him to fill you up,
embrace the fire.
Remind those who tell you otherwise that
Love
comes to you of its own accord,
and the yearning for it
cannot be learned in any school.

sath chaltey aa rahey hain paas aa saktey nahin

sath chaltey aa rahey hain paas aa saktey nahin
ek nadi k do kinaron ko mila saktey nahin

deney waley ne diya sab kuch alag andaz sey
samney duniya pari hai aur utha saktey nahin

iski bhi majbooriyan hain meri bhi majbooriyan hain
roz miltey hain magar ghar me bata saktey nahin

Kisney kiska naam eent pe likha hai khoon sey
Ishtiharon sey ye deewareyn chupa saktey nahin

uski yaadon sey mehekney lagta hai sara baadan
Pyar ki khushboo ko seeney main chupa saktey nahin

Raaz jab seeney sey bahar ho gaya apna kahan
ret pe bikhrey huye ansu utha saktey nahin

Mere apne mujhe mitti main milane aaye

Mere apne mujhe mitti main milane aaye
Ab kahin jake mere hosh thikane aaye

Tune baalon main saja rakkha tha kagaz ka gulaab
Main ye samjha ke bahaaron ke zamane aaye

Chaand ne raat ki dehliz ko bakhshen hai chirag
Mere hisse main bhi ashqon ke khazane aaye

Dost hokar bhi mahino nahi milta mujhse
Usse kehna ke kabhi zakhm lagane aaye

Fursaten chaat rahi hai meri hasti ka lahoo
Muntazir hun ki mujhe koi bulane aaye

Abhi to sirf parinde shumar karna hai

Abhi to sirf parinde shumar karna hai
Ye phir batayenge kiska shikar karna hai

Ye teri peeth hai ae mere bekhabar dushman
Magar mujhe tere seene pe war karna hai

Hum apne shahar main mehfooz bhi hain khush bhi hai
Ye sach nahi hai magar etbaar karna hai

Hamara shauk hai dar o rasan ki paimaish
Tumhara kaam kabutar shikaar karna hai

Tujhe kabile ke kanoon todna honge
Mujhe to sirf tera intezar karna hai

Bahut guroor hai tujhko ae sarfire tufaan
Mujhe bhi zid hai ke dariya ko paar karna hai

Mohabbat main tumhey ansu bahana tak nahin aya

Mohabbat main tumhey ansu bahana tak nahin aya
Banaras main raheyy aur paan khana tak nahin aya

Na jaaney log kaisey mom kar letey hain patthar ko
Hamey to aap ko bhi gudgudana tak nahin aya

Shikari kuch bhi ho itna sitam accha nahin hota,
Abhi to chonch main chidya k dana tak nahin aya

Ye kaisey raste se leke tum mujhko chaley aye,
Kahan ka maikada ek chaykhana tak nahin aya.

Mashhoor thhe jo log samandar ke naam se

Mashhoor thhe jo log samandar ke naam se
Aankhen mila paaye mere khali jaam se

Jheelon main gusl karte hai rangeen kanwal ke phool
Mausam ne dil main aag laga di hai shaam se

Ae dil ye bargah mohabbat ki hai yahan
Gustakhiyan bhi ho to bahut ehteram se

Murjha chuke hai ab meri awaaz ke kanwal
Maine sadaen di hai tujhe har maqaam se

Kuchh kam nahi hai tere mohalle ki ladkiyan
Aawaz de rahi hai mujhe tere naam se

Yaad aa rahe hai mujh ko nida fazli ke geet
Mausam ne dil main aag laga di hai shaam se

Kahin ishq ka taqazaa kahin husn ke nazarey

Kahin ishq ka taqazaa kahin husn ke nazarey
Na bacha sakenge daaman gum-e-zindagi ke maarey

Main un ka ho kar bhi na paa saka un ko
Meri tarah zindagi me koi jeet ke na haare

vo rulakar ha.Ns na paayaa der tak

vo rulakar ha.Ns na paayaa der tak
jab mai.n rokar muskuraayaa der tak


bhuulanaa chaahaa agar us ko kabhii
aur bhii vo yaad aayaa der tak


bhuukhe bachcho.n kii tasallii ke liye
maa.N ne phir paanii pakaayaa der tak


gun_gunaataa jaa rahaa thaa ik faqiir
dhuup rahatii hai naa saayaa der tak

Wo ek teer hai jis ka shikar main bhi hoon

Wo ek teer hai jis ka shikar main bhi hoon
Main ek harf sahi dil ke paar main bhi hoon

Wo samne raha dariya ka dusra sahil
Agar jahaaz na duba to paar main bhi hoon

Kise khabar hai ke soye samandaron ki tarah
Bahut dino se bahut beqarar main bhi hoon

Yahan to maut ka sailaab aata rehta hai
Bahut bacha tha magar abki baar main bhi hoon

Use to kher bahut kuchh kaha suna maine
Wo khush nahi hai magar beqarar main bhi hoon

Na jaane kis ke muqaddar main wo likha hoga
Magar ye sach hai ke ummidwar main bhi hoon

Sar pe saayaa sa dast-e-dua yaad hai;

Sar pe saayaa sa dast-e-dua yaad hai;
apne aangan mein ek per tha yaad hai.

jismein apni parindon se tasbeeh thi;
tumko school ki wo dua yaad hai?

aisa lagta hai har imtehaan ke liye;
zindgi ko humaaraa pataa yaad hai.

maikade mein azaan sun kar roya bahut;
is sharaabi ko dil se khuda yaad hai

main, puraani haweli ka pardaa mujhe;
kuchh kahaa yaad hai kuchh suna yaad hai...

Sulagte saare chhappar lag rahe hai

Sulagte saare chhappar lag rahe hai
Kavelu maqbaron par lag rahe hai

Babool aangan main boya ja raha hai
Pahadon par sanobar lag rahe hai

Magar andar koi sahraa chhupa hai
Bazaahir hum samandar lag rahe hain

Jahaalat ko sanad bakhshi gayi hai
Sitaarey pattharon par lag rahe hain

Bahut rangeen tabiyat hain parinde
Darakhton par calender lag rahe hai

Uqaab un main koi hoga to hoga
Humein to sab kabutar lag rahe hain

Yahan dariya pe paabandi nahi hai
magar pehre labon par lag rahe hain

Khuda se kaam koi aa pada hai
Bahut masjid ke chakkar lag rahe hai

paa-ba-gil sab hai.n rihaa_ii kii kare tadabiir kaun

Poet: Parveen Shakir

paa-ba-gil sab hai.n rihaa_ii kii kare tadabiir kaun
dast-bastaa shahar me.n khole merii zanjiir kaun 
meraa sar haazir hai lekin meraa munsif dekh le
kar rahaa hai mere fard-e-jurm kii tahariir kaun

aaj darvaazo.n pe dastak jaanii pahachaanii sii hai
aaj mere naam laataa hai merii taaziir kaun

niind jab Khvaabo.n se pyaarii ho to aise ahad me.n
Khvaab dekhe kaun aur Khvaabo.n ko de taabiir kaun

ret abhii pichhale makaano.n kii na vaapas aa_ii thii
phir lab-e-saahil gharaundaa kar gayaa taamiir kaun

saare rishte hijrato.n me.n saath dete hai.n to phir
shahar se jaate hue hotaa hai daaman_giir kaun

merii chaadar to chhinii thii shaam kii tanhaa_ii ne
beridaa_ii ko merii phir de gayaa tashahiir kaun

dushmano.n ke saath mere dost bhii aazaad hai.n
dekhanaa hai khe.nchataa hai mujh pe pahalaa tiir kaun

Dasht-E-Tanhaaii Mai

(Faiz Ahmed Faiz)

Dasht-E-Tanhaaii Mai,

Ae Jaan-E-Jahan Larzaan Hain

Teri Awaaz Ke Saaye,

Tere Honton Ke Saraab

Dasht-E-Tanhaaii Mai Doorii Ke Khass-O-Khaak Talay,

Khil Rahe Hain Tere Pehlu Ke Saman Aur Gulaab

Uth Rahi Hai Kahin Qurbat Se,

Teri Saans Ki Aanch,

Apni Khushboo Mai Sulagtii Hui,

Madham Madham

Door Ufaq Paar Chamakti Hui,

Qatra Qatra,

Gir Rahi Hai Teri Dil-Daar Nazar Ki Shabnam

Iss Qadar Piyar Se,

Ae Jaan-E-Jahan Rakha Hai,

Dil Ke Rukhsaar Pe Iss Waqt,

Teri Yaad Ne Haath

Yun Gumaan Hota Hai,

Garchay Hai Abhi Subh-E-Firaaq,

Dhal Gaya Hijr Ka Din,

Aa Hi Gaii, Wasl Ki Raat

Bol Ke Lab Aazad Hain Tere

(Faiz Ahmed Faiz)

Bol Ke Lab Aazad Hain Tere



Bol Ke Lab Aazaad Hain Tere,

Bol Zubaan Ab Tak Teri Hai,

Tera Sutawaan Jism Hai Tera,

Bol Ke Jaan Ab Tak Teri Hai,

Dekh Ke Aahangar Ki Dukaan Mai,

Tund Hain Sholey Surkh Hai Aahan,

Khulne Lage Quffalon Ke Dahaane,

Phela Har Ek Zanjeer Ka Daaman,

Bol Yeh Thora Waqt Bohot Hai,

Jism-O-Zabaan Ki Maut Se Pehle,

Bol Ke Sach Zinda Hai Ab Tak,

Bol Jo Kuch Kehna Hai Keh Le!

Ik Baar Kaho Tum Meri Ho

(Ibn-e-Insha)

Ik Baar Kaho Tum Meri Ho

Hum Ghoom Chuke Basti Ban Mai
Ik Aas Ki Phaans Liye Mann Mai
Koi Sajan Ho, Koi Pyaara Ho
Koi Deepak Ho, Koi Taara Ho
Jab Jeewan Raat Andheri Ho
Ik Baar Kaho Tum Meri Ho

Jab Sawan Baadal Chaaye Hon
Jab Phagan Phool Khilaaye Hon
Jab Chanda Roop Lutaata Ho
Jab Suraj Dhoop Nahaata Ho
Ya Shaam Ne Basti Gheri Ho
Ik Baar Kaho Tum Meri Ho

Haan Dil Ka Daman Phaila Hai
Kiyu Gori Ka Dil Maila Hai
Hum Kab Tak Peet Ke Dhoke Mai
Tum Kab Tak Dor Jharoke Mai
Kab Deed Se Dil Ko Sairi Ho
Ik Baar Kaho Tum Meri Ho

Kiya Jhagra Sood Khasaare Ka
Yeh Kaaj Nahi Banjaare Ka
Sab Sona Ropa Le Jaye
Sab Duniya, Duniya Le Jaye
Tum Ek Mujhe Bohteri Ho
Ik Baar Kaho Tum Meri Ho

Farz Karo

(Ibn-e-Insha)

Farz Karo

Farz karo ham ahl-e-wafa hon, farz karo deewaane hon,

Farz karo yeh dono baatain jhooti hon, afsaane hon

Farz karo yeh nain tumhare, sach much ke meh-khane hon,

Farz karo tumhen khush karne ke dhoondhe ham ne bahane hon

Farz karo yeh jee ki bipta jee se jor sunai ho

Farz karo abhi aur ho itni, aadhi ham ne chupai ho

Farz karo yeh jog be-jog ka, dhong hi ham ne rachaya ho,

Farz karo bas yahi haqeeqat, baqi sab kuch maya ho

Farz karo yeh rog ho jhoota, jhooti peet hamari ho,

Farz karo is peet ke rog mai saans bhi ham pe bhari ho.

Mohabbat Kam Nahi Hogi

(Farhat Abbas Shah)

Mohabbat Kam Nahi Hogi

Tumhari Talkhiyon Se

Aur Tumhare Na-Tarashida Rawayyon Se

Tumhari Choti Choti Ranjishon Se

Aur Bari Narazgi Se Bhi

Mohabbat Kam Nahi Hogi

Tumhare Shehr Bhar Se Dil Laga Lene Ki Aadat Se

Tumhari Be-Wafai Se

Tumhari Be-Hisi Se Bhi

Mohabbat Kam Nahi Hogi

Anaa Ka Darmiyan Aa Kar

Kai Be-Saakhta Jazbey Achanak Maar Jane Se

Dilon Ko Zaat Par Se Waar Jane Se

Kisi Basti Mai Jaa Basne

Kisi Sehra Mai Rasta Bhool Jane

Ya Samandar Paar Jane Se

Mohabbat Kam Nahi Hogi

Kisi Ke Jeet Jane Se

Kisi Ke Haar Jane Se

Mohabbat Kam Nahi Hogi

Hazaron Dukh Paren Sehna Mohabbat Mar Nahi Sakti

(Wasi Shah)

Hazaron Dukh Paren Sehna Mohabbat Mar Nahi Sakti

Hai Tum Se Bas Yahi Kehna Mohabbat Mar Nahi Sakti

Tera Har Baar Mere Khat Ko Parhna Aur Ro Dena

Mera Har Baar Likh Dena Mohabbat Mar Nahi Sakti

Kiya Tha Hum Ne Campus Ki Nadi Par Ik Haseen Wada

Bhale Hum Ko Pare Marna Mohabbat Mar Nahi Sakti

Jahan Mai Jab Talak Panchi Chehekte Urte Phirte Hain

Hai Jab Tak Phool Ka Khilna Mohabbat Mar Nahi Sakti

Puraane Aihd Ko Jab Zinda Karne Ka Khayal Aaye

Mujhe Bas Itna Likh Dena Mohabbat Mar Nahi Sakti

Wo Tera Hijr Ki Shab Phone Rakhne Se Zara Pehle

Bohot Rote Hue Kehna Mohabbat Mar Nahi Sakti

Agar Hum Hasraton Ki Qabr Mai Hi Dafan Ho Jayen

To Yeh Katbon Pe Likh Dena Mohabbat Mar Nahi Sakti

Puraane Raabton Ko Phir Naye Waadey Ki Khuwahish Hai

Zara Ek Baar To Kehna Mohabbat Mar Nahi Sakti

Gaye Lamhaat Fursat Ke Kahan Se Dhondh Kar Laaon

Wo Pehron Haath Par Likhna Mohabbat Mar Nahi Sakti

Is Ghareebi Mai Guzara Nahi Hota Maula

(Farhat Abbas Shah)

Is Ghareebi Mai Guzara Nahi Hota Maula

Ghaib Se Koi Ishara Nahi Hota Maula

Mujh Ko Hijrat Ki Koi Raah Sujha Himmat De

Mujh Se Yeh Shehr Gawara Nahi Hota Maula

Jab Mai Ghar Jata Hun Amboh-E-Masaib Mai Kabhi

Tujh Bina Koi Sahara Nahi Hota Maula

Sochta Hun To Har Ik Simt Samandar Hi Miley

Dekhta Hun To Kinara Nahi Hota Maula

Kuch Na Kuch Phir Bhi Kami Rehti Hai

Chand Hota Hai Sitara Nahi Hota Maula

Na Tha Kuch To Khuda Tha, Kuch Na Hota To Khuda Hota

(Mirza Ghalib)

Na Tha Kuch To Khuda Tha, Kuch Na Hota To Khuda Hota
Duboya Mujh Ko Hone Ne, Na Hota Mai To Kiya Hota

Hua Jab Gham Se Yun Be’hiss To Gham Kiya Sar Ke Katne Ka
Na Hota Gar Judaa Tann Se To Zaanoo Par Dhara Hota

Hui Muddat Ke Ghalib Mar Gaya, Par Yaad Aata Hai
Wo Har Ik Baat Par Kehna Ke Yun Hota To Kiya Hota

Kitni Zulfen Khulein Kitne Aanchal Urre Chand Ko Kiya Khabar

Kitni Zulfen Khulein Kitne Aanchal Urre Chand Ko Kiya Khabar

Kitna Maatam Hua Kitne Aansu Bahe Chand Ko Kiya Khabar

Muddaton Us Ki Khuwahish Mai Chalte Rahe Haath Aata Nahi

Chah Mai Is Ki Pairon Mai Hain Aablay Chand Ko Kiya Khabar

Wo Jo Nikla Nahi To Bhatakte Rahe Hain Musafir Kai

Aur Lut’te Rahe Hain Kai Qaaflay Chand Ko Kiya Khabar

Wo To Apni Nagri Mai Madhosh Hai Kab Se Khamosh Hai

Kon Raja Bana Kitne Syed Lutey Chand Ko Kiya Khabar

Is Ko Daawa Bohot Meethe-Pan Ka Wasi Chandni Se Kaho

Is Ki Kiranon Se Kitne Hi Ghar Jal Gaye Chand Ko Kiya Khabar



(Wasi Shah)