اُن کے اشکوں کو کہاں تک گریۂ شبنم کہیں
آؤ معیارِ نظر بدلیں فسانے کم کہیں
ہے کفِ موجِ صبا میں تارِ دامانِ حیات
اہلِ دِل اِس کو میری تقدیر کا پرچم کہیں
ریشمی کِرنوں میں لپٹا ہو بدن تقدیس کا
چاندنی پھیلے تو ہم افسانۂ مریم کہیں
دِل کے پیمانے میں رقصاں ہے سمندر کا مزاج
ہم اِسے اپنی زباں میں کیوں نہ جامِ جم کہیں
دِل یہ کہتا ہے مآلِ موسمِ گُل دیکھ کر
ہر خوشی کی بزم کو ہم حلقۂ ماتم کہیں
نکہتوں کے شہر میں جائیں تو اربابِ نظر
زخم کو عکسِ رُخِ گُل اشک کو شبنم کہیں
استعاروں ہی سے قائم ہے بھرم ہر چیز کا
موجِ صہبا کو لہو اور انگبیں کو سم کہیں
ہر نئی لغزش کو دیتے ہیں نیا عنوان ہم
زندگی! کب تک تیری تحریر کو مبہم کہیں
اب نہ اُس کی یاد ہے محسنؔ نہ لمحوں کا فریب
زیست کی اِس کشمکش کو کونسا عالم کہیں
No comments:
Post a Comment