Mudaavaa Habs Kaa Hone Lagaa Aahistaa Aahistaa

Mudaavaa Habs Kaa Hone Lagaa Aahistaa Aahistaa
Chalii Aatii Hai Wo Mauj-e-Sabaa Aahistaa Aahistaa

Zaraa Waqfey Sey Nikley Gaa Magar Nikley Gaa Chaand Aakhir
K Suuraj Bhii To Maghrib Mein Chhupaa Aahistaa Aahistaa

Koii Suntaa To Ek Kohraam Barpaa Thaa Havaaon Mein
Shajar Sey Ek Pattaa Jab Giraa Aahistaa Aahistaa

Abhii Sey Harf-e-Rukhsat Kiyon Jab Aadhii Raat Baaqii Hai
Gul-o-Shabnam To Hotey Hain Judaa Aahistaa Aahistaa

Mujhey Manzuur Gar Tark-e-Ta'alluq Hai Razaa Terii
Magar Tootey Gaa Rishta Dard Kaa Aahistaa Aahistaa

Phir Iss K Baad Shab Hai Jis Kii Had Subh-e-Abadd Tak Hai
Mughannii Shaam Kaa Naghma Sunaa Aahistaa Aahistaa

Shab-e-Furqat Mein Jab Najam-e-Sahar Bhii Doob Jaatey Hain
Utartaa Hai Merey Dil Mein Khudaa Aahistaa Aahistaa

Main Shahar-e-Dil Sey Niklaa Hon Sab Aawaazon Ko Dafnaa Kar
"Nadem" Àb Kaun Detaa Hai Sadaa Aahista Aahistaa