wo bhi saraahne lage arbaab-e-funn ke baad

wo bhi saraahne lage arbaab-e-funn ke baad
daad-e-sukhan mili mujhe tarq-e-sukhan ke baad

deewanwaar chaand se aage nikal gaye
thehra na dil kahin bhi teri anjuman ke baad

eelaan-e-haq main khatra-e-daar-o-rasan to hai
lekin sawaal ye hai ke daar-o-rasan ke baad

insaan ki khwaahishon ki koyi intehaa nahi
do ghaz zameen bhi chahiye do ghaz kafan ke baad

honthon ko see ke dekhiye pachataaiyegaa aap
fitne bhi jaag uthte hain aksar ghutan ke baad.