Safar ki had hai wahan tak ke kuch nishan rahe

Safar ki had hai wahan tak ke kuch nishan rahe
Chale chalo ke jahan tak ye asman rahe

Ye kya uthaye qadam aur aa gaii manzil
Maza to jab hai ke pairon may kuch thakaan rahe

Wo shakhs mujh ko koi jalsaaz lagata hai
Tum us ko dost samajhate ho phir bhi dhyan rahe

Mujhe zameen ki geharaion ne daab liya
Main chahata tha mere sar pe asman rahe

Ab apane beech marasim nahin adawat hai
Magar ye baat hamare hi darmiyaan rahe

Magar sitaron ki faslen uga saka na koi
Meri zameen pe kitane hi asman rahe

Wo ek sawal hai phir us ka saamana hoga
Dua karo ke salamat meri zaban rahe